Iphasi alikajami liyatjhuguluka
Yingakho mihla namalanga
Ngilwisana nevalo elingafuni ukusuka ehlizwenami
Lihleli lakhile emkhumbulwenami.
Lilivalo elithiye ukwesaba
Lim’lobokazi onganapelesi
Ngithuswa kukobana ngelinye ilanga
Siyokuvuka silibele bonyana sibobani.
Siyokulibala bonyana simaphupho wabo baMkhulu
Silibale sitjhiye lokhu okusenza thina
Thina sitjhujiswa kunzinza kwamasiko wethu
Aphothelelwe enhlizweni nemkhumbulweni yethu.
Ngirhabhudhleka ihliziyo
Bengitsenge iinyembezi
Nangibona thina lutjha sirhirika ngamunye ngamunye
Kwenthoro zirhirika es’rholwaneni.
Amasiko alilifa esalitjhiyelwa bobamkhulu
Alilifa elisinikela umhlahlandlela
Umhlahlandlela osidesela emnothweni wokuzazi.
Alilifa elifanelwe kunakelelwa.
Isiko kithi limlusi thina sibe yihlambi
Ihlambi yatjhida kumlusi iyalahleka
Sinjalo ke thina
Nasitjhiya amasiko ngemva siyalahleka.
Amasiko asekukhulumeni, ekudleni nek’mbatheni kwethu
Amasiko abonakala kikho konke esikwenzako
Ngaleyondlela amasiko akithi
Ukuwalahla kuzilahla thina.
Amasiko am’thombo wolwazi
Asifundisa imvelaphi yethu
Asifundisa ihlonipho nobuntu
Abuye asifundise ithando nezwano.
Ngiwo godu asithungelanako sisitjhaba
Asenza sihluke kwabanye
Asenza amathuthumbo wemibalala
Bekasenze iinkanyezi eziletha umkhanyo.
Asiwanakeleleni amasiko wethu
Siwathande besizikhakhazise ngawo
Siwaqophe enhlizweni nemkhumbulweni yethu
Siwambathe komnqcele ehloko.