Ngiyafisa ukunivulela is'fuba
Ngin'phakele okusehlizweni
Nginenze nizwisise lokhu nami
Ngamanye amalanga engingakuzwisisiko.
Kodwana njengakoke epilwenami
Ukwesaba kuyangikhandela
Kungakhise imithangala emide
Evimbel'iphimbo lam'ekuzwakaleni.
Mhlamunye ngelinye ilanga
Ngingazi bonyana liyokufika nini
Ngiyok'fuman'isbindi sokurhwelela
Ngephimbo eliyokugiriza imithangala le.
Mhla lifika ilangelo
Ngiyok'jama es'qcongolweni sentaba
Nginirhuthulel'imizwami kwamagagasi welwandle
Ngiyokukhukhula koke okufihlek'esfubeni sami.
Kuyoba ngasuthi kufike isiwuruwuru
Siyok'phekelelwa lisizi kwabanye
Kwabanye siyokuba mngani
Oyokuza nezipho zokuthula.
Ngiyok'tjatha isbebhu ngirage imizwami
Inga ngiraga ihlambi isiy'emadlelweni
Ngiyokutsengisa imizwami ekujuleni kwehlizwami
Ngiyoniqcongela indatjana.
Angiyokudzubhula okubalulekileko kwaphela
Ngiyokuthwala umjeka weqcinisw'ehloko
Ngitjhitjhinge ngiye ngemthonjeni wehlizwami
Ngibuye ngiwuzalise amanzi anepilo.
Ek'yothi labo abayokusela kiwo bavuseleleke
Abanye bayowurarha ugenuke
Amanzi arhuthukele ehlabathini enothileko
Eyok'thela iinthelo ez'yokutjhugulula iphasi.