Kwenzeka msinya ngingakatjheji,
Kwaphazima kombani
Umzimbami wabanjwa yigezi,
Ngambathwa livalo
Ngagubuzeswa lihlazo
Ngazizwa ngibhun'bhunu.
Kwabanzima emehlweni
Kwanga ngingathola umgodi ngiz'phosele
Ngizidibizese ngehlabathi ngingabonwa
Ihlazo elingaka ngiyolitjela bani?
Ngabuzwa Ngavuma
Ngathi nginguye ngingasuye
Ngibalekela ukuzihlathulula
Ngizama ukuvika imibuzo
Iye ngahlaza isikhethu.
Ihlazo elingaka ngiyolitjela bani?
Angikakaphiki kodwana angikazivezi
Ngakhetha indlela elula kunokuzihlathulula
Ngabalekela irarano kunokulirarulula.
Ngaphosa ngabheda
Ngakhohlwa imvelaphi yami
Ngahlaza isikhethu
Ngazihlaza nami
Nganyenyebula ubuNdebele bami
Ngambatha isiko lakosobantu.
Leli lihlazw'engekhe ngalithwala godu
Leli lihlazo elang'vul'amehlo
Ngabona ngatjheja ngazwisisa
Ngakhetha ukuzihlathulula
Ukulungisa nokurarulula abarareneko.