Ithuthumbo

Kude ephasini lamabhudango afezekako, ephasini lemithi ehlaza ethelako, emathuthumbeni amahle aphazimako, elangeni elihle nalivelako nalokha naliziphosa kunina, esibhakabhakeni esinganamafu.

Kwayekukhona ithuthumbo ebelingafani namathuthumbo wephasineli,lalingaqcakazi njengamanye, belilikhulu iimphambeko zalo bewuzibona ukude, belingaqcakazi ngombana belimbatjhile libajwe lithuli.

Woke amathuthumbo bekahlekisa ngalo, bebadlala ngemiphambeko yalo bahleke bebabethane ngezandla. Bewuzobezwa besithi "mqcaleni ngobukhulu bakhe usiqcedela indawo, nokumbatjha umbatjile" bahleke uzwe omunye angezelela athi "yini ufuna sikuphe isitjhatjho mhlambe uzokubaqcono".

Bekubabuhlungu kuye ihlizwakho igubuzeswe lihlazo, aziqcale ngemanzini azibuze bonyana kanti yena yini emenze wangafani nabanye. Bekazihlalela emva le angafuni nokubonwa, athandaze afise kwanga kungafika izulu elikhulu limkhukhule afe kuphele ngaye.

Bekuthi amanye amathuthumbo nakamqcalako bekafisa sengasuthi anganyamalala angabonwa, emkhumbulweni wakhe bekabhudanga ngephasi lapho bekazokwamukelwa khona, lapho bekangazozizwa njenge phandle, lapho bekazobamkhulu angabilihlaya kodwana koke lokho bekuphela ngokuba libhudango nje khuphela.

Ngelinye ilanga bekulilanga elifana namanye amalanga, ubuhle bephaseli bagubuzeswa lilifu elimnyama, imithi yatjhwaba kwaba nesivungivungu esikhulu somoya, namatlhari wemithi waphephuka, kwabanzima kwangaba nendawo yokubalekela.

Kwaba nesivunguvungu isiwuruwuru ebesiphephula konke esikuthola phambi kwaso, amathuthumbo amancani waphephulwa mumoya, kwakubuhlungu ethuthumbeni elikhulu ukubukela konke lokhu kwenzeka nanyana gade afisa bonyana avelelwe bubumbi woke amathuthumbo ebekamenze ihlaya.

Ngemva kwesikhatjhana isivunguvungu lesi sithomile kwazwakala ngephimbo eliphezulu selirhuwelela lithi "ngiyozivula ngiphelele ngibemkhulu kunalokhu ngizonisitheza nginivikele nonke bonyana ngingaphephulwa mumoya lo".

Lenza njalo ithuthumbo elikhulu, woke amathuthumbo angena ngaphasi kwalo wavikeleka. umoya waya ngokukhula wazipha amandla kwabangathi nalo lizokuphephuka belabanjwa lilotho kodwana akhange liphele amandla laqcubeka labavikela boke, umoya waya ngokuthula bewadlula.

Isibhakabhaka savuleka kwakhanya, konke kwabuyela esigeni kodwana ethuthumbeni elikhulu koke kwatjhuguluka, laba yikutana yang'khabo, wathola ithando bewamukeleka kusukela mhlokho wafunda ukuzikhakhazisa namanye amathuthumbo wamhlonipha akhange asahlekisa ngaye. Baphila boke ngethando nezwano bebaba bangani.