Ngiyaniqongela

Kwaakwaa kwaakwii

Bandamelani nitjhidele

Nginidembele indatjana nasi

Ngibhul'umbethe nginiqongele

Nginiqoqele ngami.

Ekhethu kwaSkosana

Skosana sikaMusi kaMhlanga

Komo kaNanasi

Kunzi wakoGwazana

Wathapha ngathi uthapha umthangala

Kanti uthapha imbambo zendoda.

Ngimntazan'emaJalini

Ithorong'thoma ngakwabo

Ekheth'omkhulu kwaMvuleni

Kwaphahlwa kwabikwa kwahlatjhwa

Ngahlukaniswa nobutjhuburu

Kwathiwa nginguNofanezile.

Abangaziko bathi

Ngiyipotwe phuphum'ithabo

Ngizeluthando ngiyageleza

Ngimuhle kwelanga naliziphosa kunina

Ngizanomkhanyo senga yiNyez'ebusuku

Ngifana nekwekwez'esibhakabhakeni.

Ngilithuthumbo elaniselwa ngunoBabhalile

Imirabho yami ilengela ngemlanjeni

Ngodlhekile nginejamo ngiyakarisa

Ngiyengel'eduze abadlula ngedlela

Nehlizw'eqcinileko ngiyayithambisa.