Wadlala ngami
Wangithembisa izul'wephasini
Wathi iyini ipilw'akho ngaphandle kwami
Wafunga ngoZimu nabeZimu
Watjho wathi uyongithanda bekube sekupheleni.
Kodwana sewuqcula enye ingoma
Ugida ngelinye inyawo
Wahla izandla utjhiya ingoma
Nephimbo lakho selizele iintukuthelo.
Sengisele ngedwa ngirarekile
Ngibhudabhudana phasi nemibuzo
Imibuzo engana'mphenduli
Umphenduli wayo kunguwe ongasangifuniko.
Ngiyazibuza bonyana uphila njani
Ngombana wathi ngekhe waphila ngaphandle kwami
Wathi ngiyihlizw'akho ngipompa igazi
Kazi kuya njani ngaphandle kwehlizwakho.
WabaMhlekisi wangenza ihlaya
Wayisaphaza phasi ihlizwami, wagida phez'kwayo
Ngalila ngangatholi umthulisi
Lajama iphasi lami, lakho laraga layaphambili
Maye! ngililela boke osayokudlala ngabo
Udlalile ngemizwa yami
UZimu inisa izulu lamanzi, wena unisa izulu lenyembezi
Ngiyafisa ukwazi uyokuphelelaphi
Wadlala ngami.